Kungiyar Kasashen Turai Zata Sanya Ido Kan Zanben Cikin Gida A PDP

Jam'iyyar PDP ta bayyana cewar zata fitar da dan takarar shugaban kasa da duk 'yan jam'iyya da 'yan kasa zasu aminta da shi.

PDP zata gudanar da zaben fitar da dan takarar

shugaban kasa a garin Fatakwal, jihar Ribas,

ranar 6 da 7 ga watan Oktoba.

Kakakin jam'iyyar PDP, Kola Ologbondiyan, ya

shaidawa manema labarai a jiya, Asabar, cewar

jam'iyyar na iya bakin kokarinta domin ganin ta

gudanar da zaben fitar da dan takarar cikin

nasara.

Ologbondiyan ya yi zargin cewar jam'iyyar APC

mai mulki na kokarin haddasa rikici a cikin

jam'iyyar. Amma ya ce PDP ba zata bari wani

abu ya hana ta yin nasara ba.

" Zamu gudanar da taron gangami cikin nasara kuma ba tare da rabuwar kai ba kuma zamu fitar da dan takarar da duk 'yan Najeriya zasu karbe shi hannu biyu.

"Kungiyar kasashen Turai (EU) ta nuna sha'awar saka ido a zaben mu na cikin gida. Muna iya bakin kokarinmu don gudanar da sahihin zabe na adalci.

"Za a nuna taron kai tsaye a gidajen talabijin, " a cewar Ologbondiyan. Ya kara da cewar PDP ba zata bari wani mutum ya yi kokarin juya akalar taron domin bawa wani dan takara fifiko ba.

Za a gudanar da zaben fitar da dan takarar ne

tsakanin tsohon mataimakin shugaban kasa,

Atiku Abubakar, tsohon gwamnan Kano, Sanata

Rabi'u Musa Kwankwaso, shugaban majalisar

dattijai, Sanata Bukola Saraki, gwamnan jihar

Sokoto, Aminu Waziri Tambuwal, tsohon

shugaban majalisar dattijai, Sanata David Mark,

tsohon gwamnan jihar Filato, Jonah Jang da

tsohon minista a gwamnatin Jonathan, Tanimu

Turaki.