Manya-Manyan Abubuwan Da mukaddashin shugaban kasa ya aiwatar Bayan Tafiyar Shugaba Buhari.

Tun tafiyar shugaba Muhammadu Buhari
kawo yanzu mukaddashin shugaban kasar
Yemi Osinbajo ya dauki matakai da ayyuka
da dama a kasar.

Yanzu haka dai Farfesa Osinbajo ke rike
da Najeriya ya kuma yi ayyuka tafiyar
shugaba Buhari na a-zo-a-gani. Kadan
daga ciki su ne sauyi da aka gani a
tsare-tsaren harkar kudin kasar daga
CBN. Farfesa Osinbajo kuma ya shiga
lungunan Neja-Delta domin kwantar da
rikicin da ke Yankin.

Mukaddashin shugaban kasa Farfesa
Yemi Osinbajo ya saki kudin wasu
manyan kwangiloli a Kaduna da Legas
wancan makon bayan taron Majalisar
FEC. Haka kuma Shugaban rikon
kwaryar ya ci burin gyara tattalin
arzikin Najeriya ta hanyar saukake
harkar kasuwanci a kasar cikin watanni
biyu.

Gawurtattun abubuwan da Osinbajo yayi tafiyar
Buhari
Tun hawan sa dai ya nada Kwamiti
domin ya ji dalilin da ya sa farashin
abinci ya tashi a Najeriya. Farfesa
Osinbajo ya kuma gana da shugabannin
Majalisa ba sau daya ba, ba sau biyu ba
a game da harkar kasafin kudin
wannan shekarar.

Osinbajo ya kuma rattaba hannu a wasu
kudirori da Majalisar ta aiko masa
yayin da kuma yayi mursisi yayi watsi
da wasu kudirorin tare da bayyana
dalilan sa. Har a kasar waje dai ana ta
kawo ziyara ga shugaban kasar na
rikon karya inda shi ma ya taka har
kasar Gambia wajen nadin sabon
shugaba Adama Barrow.