Yamutsi bayan da gwaggwon biri ya tuso wani manomi har gida a jihar Kuros Ribas

Al'ummar garin Bitiah Irruan dake a karamar hukumar Boki ta jihar Kuros Ribas sun shiga rudani biyo bayan wani gwaggwan biri da ya biyo wani manomin kauyen har gida bayan ya dawo daga gona a ranar Juma'ar da ta gabata. Kamar dai yadda muka samu, wani ma'abocin anfani da kafar sadarwar zamani ta Facebook mai suna Osang Gabriel ne ya shelanta hakan a shafin sa inda kuma ya bayyana cewa hakan ya ja hankalin al'ummar kauyen sosai da ma makwafta. NAIJ.com ta samu cewa yanzu haka dai komai ya fara lafawa a kauyen amma labarin na cigaba da yaduwa tare kuma da daukar hankali a sassa daban daban a fadin kasar nan.